Vladimir Putin

Vladimir Vladimirovich Putin (iman 7 Ọkitoba 1952) ìre ogwu ifit-mkpulu me Rọṣia mè oka ogwu usọ enun̄unuun̄ ogwu ònire ogwu ibot mkpulu karake acha 2012. Îwuulek ire ogwu ibot mkpulu bene me 2000 ire 2008. Putin si îwuulek ire Ogwu Otuchieen̄ Ido Rọṣia bene me acha 1999 ire 2000, mè ire si bene me 2008 ire 2012. Ọmọ ore ogwu ibot mkpulu Rọṣia òkukup ifiin̄ me irek ya karake Rọṣia okaan̄be lek isibi itele Sọviet Yuniọn.

Putin îsi ikwaan̄ acha 16 kubọk ogwu otu-ogbo enun̄unuun̄ KGB me ofifi ido mè inene me irek ikwaan̄ ire liutenant kọlọnelu. Ìtap ikpa iyaak-ikwaan̄ me acha 1991 mè ikana inin̄ ifit-mkpulu me Saint Petersburg. Me acha 1996, ifofo Mosikowu isi igọọk inin̄ emen mkpulu kè Bọris Yelsin. Me mgbidim mgbọ, îsi ikwaan̄ kubọk ogwu ibot Federal Security Service (FBS) mè ire si ogwu uti-ikpa me Sen̄urity Council eyi Rọṣia sabum enigobo ọmọ isa ito ogwu otuchieen̄ ido me Ọgọs 1999. Mgbọ Yeltsin ogebe ikpa iyaak irek mkpulu, Putin onenikana ogwu òkitet irek ibot ido ikaan̄. Me ikasoge onyan̄ ini, me emen Onyan̄-go me acha 2000, inenikana ogwu ibot mkpulu ido sa me orirọ ibene-ubọk. Mîkpọk igobo ọmọ itap me irek mkpulu me acha 2004. Sa me ikan ido ikachieekge ibe egobo ene etap me irek ogwu ibot mkpulu eraka mgbọ iba gaalek, Putin oneniyaka ire ogwu otuchieen̄ ido bene me 2008 ire 2012 me irak ogwu ibot mkpulu Dmitry Medvedev. Putin îyaka inire ogwu ibot mkpulu ido ofifi me acha 2012, sa me orirọ ibene-ubọk eyi ebi ene ekitumu ibe ke mîrie udun̄ me lek. Mîkpọk iyaka igobo ọmọ me acha 2018.

Me adasi ukot mkpulu kè Putin, ugwem mbubek Rọṣia ìkimin irek jaaba me-efit acha geelek sa me înen̄ebe inu isun̄ me agan̄ mbọm-iukpoko me ido, mè ike ewe aran̄-ijọn̄ mè efet-ukan̄ obenebe mgbọ go. Ofifi si, Putin îsa ido Rọṣia ije itibi emen akọn̄ etimbe me lek ebi Chechen ebi ìweweek ifefieek inan̄a itele ido Rọṣia, mè isa me ikeya isun̄ ema me irak mkpulu ido Rọṣia. Mgbọ ọmọ orebe ogwu otuchieen̄ ido me irak mkpulu kè Medvedev, ọmọ îkup me otuchieen̄ akọn̄ etimbe mèlek Jọjia mè inyi ida mè enen̄e inu esun̄ me agan̄ ebi akọn̄ mè ebi ikan ido. Me òso ukot mkpulu ita kan̄, Rọṣia mîtet Karaimia [Crimea] itap kire agan̄ ge me ido kiban̄, mè ibieen̄ inye ibe etim akọn̄ me lek Yukeren agan̄ mbum-ura, sa me owuwa ǹnaan̄ eyi akọn̄, eyi òrọrọ me owuwa ido efieek mgbaan̄-nrọ mèlek Rọṣia mè itap ufialek agan̄ ikpoko me ido ya. Putin înyi ntap-ubọk akọn̄ me Siria isa itap ubọk inyi ogwu ugbalek [ally] kan̄ Bashar al-Assad me emen mgbọ ekitim akọn̄ emen ido me Siria. Ìrọ ikeya inyi ikọt ikaan̄ òrieen̄ ebi akọn̄ mun̄ me agan̄ mbum-ura Okwaan̄ Ile Mediterenia.