Tempulet:Atikulu egobobe/21
Naijiria (ngwen-nsibi: [Nàìjírìà]; òrere Nigeria me ubọk ige-inu eyi Uket-chieen̄) ìre ido me Afirika. Ọmọ ore ido ebi Obolo ekiluk.
Naijiria ìre ido me Afirika agan̄ Ichep-ura. Ido echi òkukup ikana ọmọ ire Nijê me agan̄ inyọn̄; Chad me agan̄ inyọn̄ mbum-ura, Kamerun me agan̄ mbum-ura, mè Bènè me agan̄ ichep-ura kan̄. Agan̄ osiki kan̄ ìkup me Ọfọ-okwaan̄ Ginì me Emen-awaji Atilantik. Naijiria ìkaan̄ agan̄ -mkpulu 36 mèlek Agan̄ Ama-ibot Ido [FCT], ere ama-ibot kan̄, òrere Abuja, okupbe.
Naijiria ìre ido owuwa ene ìnan̄a me esese ido elukbe me emen. Otoko òwawa iraka efit iba mè akọp go (250) ekup me ido yi; otu-usem ekitumube me ido ya îwa iraka efit go (500). Otoko chi geelek mîkaan̄ esese orọmijọn̄ kiban̄. Otoko ita ìmimiin̄ ichit me etete kechilọ ìre Awusa-Fulani me agan̄ inyọn̄, Yoruba me agan̄ ichep-ura, mè Igbo me agan̄ mbum-ura. Ebi ene ìnan̄a me otoko ita chi mîwa iraka akọp irek gweregwen me efit (60%) me lek otuuk ebi ìluluk me ido Naijiria.
Usem-mkpulu me ido yi ìre usem uket-chieen̄. Emọnọ usem yi inyi ikup mfufet ebi ene ìnan̄a me esese otoko mè otu-usem ikọkọt ikpa-otu mèlek ebi ofifi ife, mè isa me ikeya etap mgbaan̄-nriaak me ido. Usem Awusa, Yoruba mè Igbo, mèlek Ùnà si ere usem ekimalek itumu me ido. Echa ere usem owuwa ene me ido ya ekinọ mè iyaka igobo itet. (Fuk òjot òjot...)