Ogbo Ikwaan̄ Usem Obolo

Ogbo Ikwaan̄ Usem Obolo ìre uwu-ikwaan̄ eyi òkikpọ chieen̄ me lek njennyisi usem Obolo. Ogbo Ikwaan̄ yi ìbene me acha 1978 sa me ntap-ubọk kè Kay Williamson, ogwu usọ-ikpa me Ọgbọn̄ <Humanities> me Uwu-ikpa-ile Pọt Akọt. Sa me ntap-ubọk kan̄ si, Nikolas Faraclas, ogwu òkikween̄ usọ usem me Uwu-ikpa Ile Kalifọnia, înu inikween̄ inu ofolek usem Obolo mè ige ikpa ekigwen A Grammar of Obolo isa ikpa usem Obolo iwele.

Ebi ogbo ikwaan̄ yi ebene ikwaan̄ me lek Ikpa Mbuban eyi Obolo me acha 1984 mè irọ isan̄a me acha 2014. Sabum 2014, uwu-ikwaan̄ ya ìre gaalek ntitiin̄ eyi ikwaan̄ echilibe isasa irọ ikwaan̄ ge, òrere ikakana Ikpa Mbuban itap me usem Obolo. Me ndọmọ mbubek, ekichichit ojelek ntitiin̄ keya mgbọ esirọ inu ebakbe me lek ichili isan̄a. Ire, ebi Obolo mîrọ inye ibe ekachit. Sa me ikeya, mîtap erieen̄ me ikpa mbubek mkpulu ido, uwu-ikwaan̄ ya onenibene ire ogbo ikwaan̄ me acha 2014.

Ikwaan̄ Ekirọ

Ebi Ogbo ikwaan̄ yi ekirọ esese esese ikwaan̄ ofolek usem Obolo. Usini ìre:

• Ijejeen̄ ebi ijejeen̄ ike ebekijeen̄ usem Obolo me uwu-ikpa
• Ijejeen̄ ebi ntitiin̄ Awaji ike ekifuk Ikpa Mbuban mè ike mêkọtbe isa ikirọ inu me emen ntitiin̄ Awaji
• Igege esese esese ikpa me usem Obolo
• Ikakana ikpa itap me usem Obolo
• Isasan̄a ikpa ulook (kubọk Ida Obolo) isibi
• Isasan̄a Aya Ifuk Obolo isibi
• Itatap chieen̄ ikpọ ikpa ebj ufi ene egebe mè inen̄e inu isun̄ me emen

Ikpa Egebe

Uwu ikwaan̄ yi mîge owuwa ikpa me usem Obolo. Usini ìre:

• Ikpa Urọk
• Adasi Ikpa Obolo
• Ikpa Obolo òso iba
• Gwun̄ Ogwu Obolo
• Workshop Guide
• Mbuban Îchaka
• Reading and Writing Obolo
• Aya Ifuk Obolo